Hazing sa gang sakpan

Gumikan sa video cam nga sekretong gikuha sa usa ka minor de edad nabisto hinuon ang sekreto niining pagsulod sa grupong Christ Rest In Peace Society kun mas naila nga CRIPS gang dihang nakit-an sa iyang amahan ang gihimong "hazing" kaniya ug sa mga higala sa tunghaan diha sa videocam.

Si PO1 Vivian Tamayo sa Argao police kinsa maoy miimbestigar sa kaso mitug-an sa Banat News nga duha ka mga "out of school youth" ang mirekrut sa mga batang nag-edad pa og trese, katorse ug 15.

Ang mga suspek giila lang sa ngalan nga sila si Kenneth nga taga Barangay Binlod ug Jet nga taga Cambanua sa Argao pulos mga hingkod ang panuigon ug giingong sakop sa CRIPS gang.

Ang mga biktima mga tinun-an sa pribadong tunghaan sa St. Michael Academy sa naasoy'ng lungsod nga gidumala sa mga madre.

Sumala pa ni Tamayo nga usa sa mga minor nga girekrut kinsa anak og usa ka polis maoy sekretong mikuha sa video camera sa iyang amahan ug gigamit kini sa pagrekord sa gipahigayon nilang initiation diha sa Binlod. Usa sa mga biktima maoy miawhag sa uban nga magdungan og sulod sa maong grupo.

Apan ang polis nga nangita sa iyang video camera miukay sa bag sa iyang anak ug didto nakit-an ang girekord nga initiation diin ang mga bata gipiringan ang mga mata ug gipatid-patiran, gipamasuan ang mga tumoy sa "middle finger" isip ritwal, usa sa mga wala magpapaso maoy gipatid-patiran.

Human sa pagkakita niini nangusog ang amahang polis sa pagpasaka og kaso batok sa mga nagpasiuda niini gamit ang video cam isip ebidensya ug ang medical certificate sa mga bun-og ug paso.

Karong adlawa gikatakdang ipasaka sa Women's Desk sa Argao police ang kaso ngadto sa piskalya.