Level 2 pusher nadakpan

Giingong level two nga drug pusher nga nag-operate diha sa barangay Kamagayan nasikop sa mga sakop sa Parian Police Station sa gihimong buybust operation niadtong Sabado sa hapon.

Ang nasikop giilang si Allan Catalan, 28 hingkod ang panuigon kinsa gikatahong naa na sa watchlist sa Cebu City Police Office apan mao pay unang higayon nga nasikop.

Si Parian Deputy Chief Elma Delos Santos sa pakighinabi sa Banat News/The Freeman kagahapon kini mitug-an nga kanunay nang mogawas ang pangalan ni Catalan sa mga drug operations sa maong dapit.

Armado sa search arrest warrant nga giisyu ni RTC Judge Simeon Dumdum gumikan sa kalapasan sa Akta Republika 9165.

Nakuha sa mga polis ang usa ka bultong may sulod nga gidudahang shabu, mga aluminum foil nga dunay mga lama sa gituuhang shabu, tulo ka mga cellular phones ug kwartang P18,570 nga gituuhang halin sa ilegal nga drogas.

Sumala pa ni delos Santos nga ang ilang asset mipahibalo kanila nga nagligas ra ang mga polis ug ang inahan sa suspek nga bag-uhay lang mibiya padulong mosugal og mahjong ug maoy nagbitbit sa mas daghang drugas.

Maong dihang ilang naabtan si Catalan mao ra kadto ang ilang nakuha gikan sa operation.