14-anyos napusilan

Usa ka katorse anyos nga batang tinun-an sa elementarya napusilan atol sa gipahigayong disko diha sa eskina sa mga dalan Tres Borces ug Borgonia barangay Mabolo ning dakbayan kagahapon sa kaadlawon.

Giila ang biktima nga mao si Joseph Rom,14, grade 5 nga tinun-an sa Subangdaku Elementary School ug molupyo sa dalan Gochan Barangay Mabolo.

Sumala pa sa mga imbestigador sa Homicide Section nga uban sa iyang silingang si Roland Jaime ug Abao Marson nanan-aw ang grupo sa kalingawan apan usa ka paka sa armas ang milanog sa palibot.

Diha na lang niya nabatyagan nga napusilan siya sa tuong bahin sa lawas diin ang bala milapos, hinungdan sa pagkaguliyang sa palibot.

Daling gidala ang biktima sa iyang ig-agaw nga si Jeffrey Chavez ngadto sa Cebu City Medical Center samtang wala pay matumbok ang kapolisan kun si kinsa ang nakapusil sa bata.