Gibiyaan sa misis nihikog

Guwardiya nga gikatahong gibiyaan sa iyang asawa napalgang nagbitay diha sa grahean sa gitrabahoang tunghaan diha sa dalan Fortich Barangay Guadalupe ning dakbayan kagahapon sa kaadlawon.

Suot pa ang kumpletong uniporme ug nagtak-in pa sa kalibre .38 rebolber ang biktimang si Rogelio Gerodias, 31, minyo, guwardiya sa Santa Monica School sa naasoyng lugar ug sakop sa Alesna Security and Detective Agency ug molupyo sa barangay Quiot Pardo ning dakbayan.

Sa imbestigasyon nila ni SPO3 Zenaido Pastorfide nga magul-anon kaayo ang biktima gumikan sa pagbiya kaniya sa iyang asawa base usab sa nagkatukmang pamahayag sa mga kaila sa biktima nga sila si Elizabeth Mabatid, ang direktor sa maong tunghaan ug Cherry Cabigas Binabaye, drayber sa tunghaan.

Ang nanglimpyong stay-in caretaker sa tunghaan nga si Estela Camacho, 24, maoy nakakita kang Gerodias nga nagbitay diha sa grahean ug wala na kini maglihok maong dali niyang gipahibalo sa mga kaubanan.

Nasuta sa Banat News sa pakighinabi sa igsuon niini nga si Annie Probidsado nga dunay tulo ka mga anak si Gerodias ug midugang si Probidsado nga mibiya ang asawa niini ug miadto sa bukid apan ang gikagul-an sa biktima kay gipaabangan ang balay nilang managtiayon ug wala nay maulian si Gerodias.

Walay nakit-ang foul play sa kamatayon sa biktima, usa ka 2.9 metros nga nylon nga pisi ang giingong gigamit sa paghikog. Samtang sa laing bahin, usa ka Eduardo Ygot Momo, 38 ang nakit-ang patay na usab diha sa iyang balay ug gituohang naghikog usab diha sa Sitio Boyong, Barangay Maribago sa siyudad sa Lapu-Lapu niadtong Sabado sa gabii.

Sa wala pa ang hitabo nakit-an pa kini nga nagtan-aw og telebisyon ug nag-inusara gumikan kay nanambong sa usa ka birthday party ang iyang mga kabanay.

Pipila ka gutlo ang milabay mibalik ang iyang pag-umangkon nga si Jay Rodrigo apan mao na lay naabtan sa bata nga ang iyang uyoan nagbitay sa pisi nga gihikot sa liog diha sa pultahan.

Matud pa sa igsuon niini nga si Virgincita Paquibot nga ang iyang igsuon adunay problema kalabot sa dugay nang gibati niini nga sakit sa iyang tiyan hinungdan nga misulay kini sa pagkutlo sa iyang kinabuhi sa makatulo ka higayon ug ning ulahi milampos gyud kini.

Dali unta siyang gidala sa Lapu-Lapu District Hospital apan gideklarar nga dead on arrival.