Batan-on gituohang giukoy

Gituohang giukoy ang usa ka batan-ong lalaki nga naligo sa sapa ug napalgan na lamang nga naglutaw sa dagat human kini malumos ug namatay.

Nahitabo kini didto sa barangay Babag, siyudad sa Lapu-Lapu sa utlanan nga bahin sa barangay Pilipog sa lungsod sa Cordova, alas 11 pasado ang takna sa buntag niadtong miaging adlaw.

Giila ang namatay nga mao si Anjen Pianar, 18, ulitawo, lumad nga taga Tabogon, Cebu ug temporaryong nagpuyo sa igsuon niini sa barangay Looc sa nahisgutang dakbayan.

Sa imbestigasyon nga gihimo sa homicide section sa kapolisan sa maong dakbayan maoy nahibaw-an nga kuyog ang biktima sa mga higala niini sa pagpangaligo sa maong lugar.

Nag-inom kini og ilimnong makahubog hangtod nga nakahukom sa pagkaligo uban usab sa pipila niini ka mga higala.

Namatikdan sa mga kauban ang kalit nga pagkawagtang sa biktima nga maoy nakaaghat sa mga kauban sa pagpangita niini apan patay na dihang ilang nakit-an

Dugang pa sa mga imbestigador sa kapolisan nga ilang nasuta nga walay mga timailhan nga adunay foul play ang kamatayon niini.