Kini maoy reaksiyon ni Asid dihang nahinabi sa Banat News nga mitubag sa pasangil sa iyang kaugalingong konsehal sa barangay Eutiquo Tabar nga namasangil ngadto kaniya nga gibaligya ang dump truck sa barangay nga walay pagtugot sa konseho ug gibulsa pa ang halin niini.
Matud sa kapitan pulos bakak ug walay kamatuoran ang maong pasangil gumikan kay nabaligya ang maong gubaon nga dump truck nga nagyaka na ug wala nay ligid sa compound sa CCF Saint Francis sa Sityo Nazareth Buhisan niadtong panahon pa ni kanhi Kapitan Menandro Diola nga usa pa siya ka konsehal sa barangay niadtong higayona.
Gani mipadayag og kompiyansa ang kapitan nga mabasura ang kasong gisang-at ni Tabar sa Ombudsman batok niya gumikan kay gawas nga wala kini basihanan wala na usab mibarog nga saksi sa reklamo.
Gihimakak ni Asid ang laing pasangil nga gikuha niya pagka tanod ang saksi niining si Diosdado Corpuz aron lang mobali sa pagtestigos batok niya gumikan kay wala siya makaila niini ug girekomendar lang kini sa iyang tanod nga si Ester Gabiana dihang nagkinahanglan siya og drayber.