Pagputol kuryente sa condo hinaw ang city hall

Walay tulobagon ang kagamhanan sa dakbayan sa Sugbo ning pagpaputol sa suplay sa kuryente sa mga okupante sa condominium unit sa dakbayan sugod niadtong adlaw'ng Martes.

Matud ni konsehal Edgardo Labella tsirman sa Committee on Laws sa konseho nga igo lang mi-withdraw ang dakbayan nga gi-representahan ni Mayor Tomas Osmeña sa consent niini sa maong condominium unit hinungdan nga giputlan sa VECO og koryenti ang maong mga pamilya.

Matud sa konsehal kun dunay angay'ng gukdon ang mga okupante mao ang VECO nga maoy nagputol sa ilang kuryente gumikan kay ang pag-withdraw sa siyudad sa consent niini wala kini magpasabot nga gipugos sila paghingilin sa siyudad aron mopahawa sa maong lugar.

Gibasihan sa konsehal ang Akta Republika 1096 ang Building Code of the Philippines nga nag-obligar sa pagpangayo og consent sa nanag-iya sa maong edipisyo isip kabahin sa rekisitos sa VECO aron kasuplayan og kuryente.

Hinoon mahimo sab nga makalusot ang Veco gumikan kay mahimo man sab nilang basihanan ang pag-withdraw sa consent sa siyudad isip maoy nanag-iya sa maong condo unit aron putlan og kuryenti ang maong mga pamilya.