Paglambo sa NHMFC gilauman

Dako ang pagsalig sa kanhi presidente sa National Home Mortage Finance Corporation (NHMFC) nga ang mohulip kaniya makapadayon sa pagpalambo sa panalapi sa buhatan sa kagamhanan nga iyang gitabangan nga masulbad ang problema sa pagpadagan niini.

Si Celso de los Angeles, Jr. sa unang pamahayag nga giluwatan niini human siya miluwat sa iyang katungdanan isip presidente sa NHMFC miingon nga nalipay siya nga mibiya sa maong buhatan nga adunay limpyo nga kita nga moabot ngadto sa P1.4 bilyones ingon man P3.4 bilyones nga nakolekta sa pahulam niini basi sa katapusang buwan sa tuig 2004.

"Bisan pa man sa kusganon nga pagsupak sa apektado nga mga grupo, apan gipatuman nato ang mga kausaban aron pagkab-ot sa atong tinguha nga ang NHMFC mahimong maayo nga buhatan sa kagamhanan," dugang ni de los Angeles.

Usa sa mga dako nga kalampusan sa pagdumala ni De Los Angeles isip presidente sa NHMFC mao ang pagka-umol sa usa ka joint venture firm ubos sa panagsabot tali sa NHMFC ingon man sa Deutsche Bank Real Estate Global Opportunities (DBGO) nga naglangkob sa pagbaligya sa P13 bilyones nga kantidad sa delinquent nga loans sa NHMFC.

Ginganlan og Balikatan Housing Incorporated (BHI), usa kini ka joint venture firm nga gipaabot nga muhatag og sulbad sa mga problema sa buhatan.

Gumikan niini, ang International Finance Corporation miapil sa Asian Development Bank paghatag og local currency loans pagtabang sa NHMFC pagresolbar sa mga delinquent nga mortage loans nga gipaabot ngadto sa mga mihulam.

Nahitabo kini sa dihang ang credit rating sa nasod nakasugat sa grabeng kalisud.

Hinuon daghan ang nasorpresa sa balita nga si de los Angeles miluwat sa katungdanan, hinoon ang iyang mga suod nakahibawo na sa iyang plano pagbalik sa pribadong sektor kon matuman na ang iyang misyon pagsalbar sa NHMFC.

Sa wala pa si De Los Angeles matudlo isip presidente sa NHMFC, siya maoy tsirman sa usa sa nag-una nga pre-need company sa nasod ang Legacy Consolidated Plans, Inc. nga adunay trust fund nga mukapin sa P156 milyones basi sa talaan sa Securities and Exchange Commission.

Hinuon sa hamubo nga panahon ni de los Angeles sa NHMFC nakadawat na kini sa pagdayeg ni Kongresista Eduardo Zialcita, tsirman sa committee on Housing and Urban Development sa ubos balay balauranan.

"Your Outstanding Leadership and Meritorious Achievements in the NHMFC deserve recognition particularly in helping craft legislation that affect the housing industry," pamahayag ni Zialcita.

Ang Home Mortage Employees Association Inc. mipalabang usab og usa ka resolusyon nga midayeg ni De Los Angeles pagpalambo sa NHMFC ingon man paghatag og benepisyo ngadto kanila nga empleyado.