Misis ni Allan gihulga sa text

Asawa ni Banat News photojournalist Allan Dizon kinsa gipatay niadtong milabay'ng tuig, nakadawat og mga hulga sa iyang kinabuhi pinaagi sa telepono gumikan sa gikatahong pagmagahi niini nga isibog ang kaso.

Si Amelina Dizon, ang nabiyudang asawa ni Dizon mitug-ang ngadto sa Homicide Section nga niadtong nakalabay'ng semana nakadawat siya og mga tawag sa telepono diha sa iyang gitrabahuang departamento sa Cebu City Hall gikan sa usa ka lalaking giingong isog kaayo ang tingog.

Matud pa ni Amelina nga mibahad ang maong lalaki nga dunay dautang mahitabo kaniya kun dili kini mosibog sa kaso kalabot sa pagpatay sa iyang bana niadtong Nobiyembre 27, 2004.

Usa ka Edgar Belandres alyas Dodong Inso nga taga Barangay Lorega San Miguel ning dakbayan ang gitumbok nga maoy mipusil kang Dizon diha duol sa SM Department Store nga nakaingon sa kamatayon niini.

Ang suspek kasamtangan karong gibilanggo sa Bagong Buhay Rehabilitation Center samtang gihusay pa ang kaso diha sa sala ni Regional Trial Court Judge Ireneo Lee Gako Jr.

Ang maong lalaki nga mitawag sa telepono gikatahong mibahad sa pag-ingon og "Isog gyud ka, dili gyud ka mosibog? Basin dili na ka kaabot og death anniversary."

Sa pakighinabi sa The Freeman/Banat News kang Amelina kagahapon, kini mitug-an nga sukad nga nagsugod ang kaso sa pagpatay sa iyang bana mao sad ang pagsugod sa mga hulga kaniya pinaagi sa pagtawag sa iyang cellphone apan wala ra niya kini panumbalinga sanglit walay numero nga mogawas diha sa iyang telepono kun diin gikan ang mitawag.

Wala hinuon siya motumbok kun si kinsa ang posibleng tawong nanghulga kaniya apan dako ang iyang pagtuo nga may kalambigitan kini sa kaso ni Allan nga iyang gibisugan sa korte.

Ang Crusade Against Violence sa samang interbyu mipasalig kang Amelina nga tabangan nga makaduol ngadto sa Regional State Prosecutor aron makapangayo og "security escort" sanglit dili man mahimong motago si Amelina gumikan sa iyang trabaho.

Mipadayag na sa iyang kahadlok si Amelina dihang sa pagkawala sa iyang cellphone natultulan gihapon ang numero sa departamento diin siya magtrabaho sa City Hall ug diha na usab magpunay og hulga kaniya ang maong tawo.

Gani ang iyang anak dili na niya dad-on sa iyang paglakaw gumikan sa maong hulga.