Tiyan sa miuwang nabuslot

Nabuslot ang tiyan ug nalungag ang buko-buko sa usa ka tawo kinsa miuwang unta sa nag-away niyang mga higala apan mao na hinuon ang nadunggaban.

Kini nahitabo sa miaging gabii sa barangay Maguikay sa siyudad sa Mandaue diin ang biktima mao si Allan Bianco, hingkod ang panuigon, ulitawo nga taga Sugar Valley sa Maguikay sa siyudad sa Mandaue.

Si Jonathan Bidos maoy gitumbok nga midunggab sa biktima kinsa dali nga gihatod sa Vicente Sotto Memorial Medical Center sa dakbayan sa Sugbo.

Sa nasayran nga nag-inom ang biktima ug ang suspetsado dihang nagkalalis ang suspetsado ug ang lain pa nilang higalang gikainom.

Mipataliwala ang biktima sa pagpakgang sa maong panag-away apan mao hinuoy gidunggab hinungdan sa pagkalandig niini sa tambalanan samtang miikyas ang suspek.