Armas ray nasakiyo

Gitulis sa tulo ka wala mailhing mga tawo ang Free Well Lending Investor diha sa F. Cabahug sa barangay Subangdaku, siyudad sa Mandaue apan ang kargadang armas sa guwardiya niini ang bugtong nasakiyo.

Ang pagtulis nahitabo alas 5 pasado ang takna sa hapon niadtong miaging Huwebes sa nahisgotang dapit sa dakbayan sa Mandaue.

Ang kalibre 38 nga armas ni Rogaciano Bonila, 35 anyos, ulitawo nga sakop sa Montana Security Agency nga gidestino sa pagbantay sa maong establisamento ang gikuha sa mga tulisan.

Si Julieta Estapia Camingao, cashier sa nahisgotang establisamento, midangop sa kapolisan sa Presinto 2 sa Subangdaku Police Station.

Si Camingao sa iyang pamahayag ngadto sa mga imbestigador miingon nga nagpakaaron ingnong kustomer ang mga tulisan.

Matud pa niini nga nanuktok pa sila sa pultahan ug pag-abli sa guwardiya kalit lang nga gitionan ang ulo ug mipahibalong tulis, apan nakita usab sa bildo ni Camingao ang maong hitabo ug maoy nakaaghat niya sa pagsibat agi sa fire exit.

Ang mga tulisan nga nakamatikod nga nakasibat ang cashier nagdali sa pagpanggawas ug nanakay og balik sa nagpaabot nga motorsiklo paingon sa dakbayan sa Sugbo.