Kasong pang-salvage vs Labra, et. al. gibasura

Reklamo batok nila ni Criminal Intelligence and Investigation Branch chief, Supt. Pablo Labra ug PO1 Brasilio Borinaga ug PO1 Frederick Ybañez sa pasangil nga ilang gi-salvaged ang gidudahang tulisan ug hostage taker nga si Joel Patana alyas Roger Rojo gi-dismiss sa Internal Affairs Service.

Kahinumdoman nga sila si Labra niadtong Hulyo 6, 2004 midala ni Rojo diha sa Forlich St. Banawa, Guadalupe human kini mibutyag nga iyang itudlo ang hideout diin magtago ang uban pa niyang kauban nga nakaeskapo atol sa checkpoint diha sa barangay Punta Prinsesa una pa siya madakpi.

Apan niadtong tungora base sa imbestigasyon sa Homicide Section nga nakabuhi sa iyang posas si Rojo ginamit ang usa ka alambre ug nakailog sa armas ni PO1 Ybañez nga iyang gition ug gikablit ngadto sa mga polis samtang sila naa pa sa sulod sa sakyanan apan wala makabuto ang armas nga nailog kay naka-safety kini.

Nianang tungora nakahimo paggawas si Rojo sa sakyanan ug misuway sa pakigpinusilay kanila maong gibawsan nila kini ug napatay.

Ang Internal Affairs Service nakahukom nga gumikan kay walay bisan usa ka testigo nga makatudlong gituyo pagpatay si Rojo mipagawas sa ilang resolusyon ug mirekomendar nga i-dismiss ang mga reklamo batok sa tulo gumikan sa kakulang sa merito.

Si Rojo maoy misulod sa usa ka panimalay diha sa Punta Prinsesa dihang gigukod na sa mga polis nga mihimo og checkpoint diha sa dalan dihang nakit-ang nanagan ang tulo ka tawo.

Diha sa balay gi-hostage ni Rojo ang usa ka pamilya gani sa mga babayeng biktima nga iyang gigakos ug gihimong taming mireklamo pang iyang gihinol-hinol ang dughan.

Giingong miyembro sa mga tulisan nga taga Mindanao si Rojo gani pipila sa mga pagpanulis sa mga establisamento dinhi sa Sugbo iyang giangkon nga sila maoy mga responsable ug nalambigit usab siya sa pagpamaligya og armas matud pa sa kapolisan.