90 gramos nga shabu 'sakmit sa ronda

Mga sakop sa Philippine Drug Enforcement Agency 7 ug Criminal Investigation and Detection Group 7 nakasakmit og gibana-banang 90 gramos nga gidudahang shabu gikan sa managlahing mga ronda nga ilang gihimo niadtong Lunes sa gabii dinhi sa dakbayan ug Mandaue.

Ang mga sakop sa CIDG7 pinanguluhan ni Chief Inspector Rex Derilo mipahigayon og buybust operation batok ni Cesar Apor diha sa dalan A.S. Fortuna sa dakbayan sa Mandaue.

Ang suspek kinsa luwan sa usa ka motorsiklo wala kaugpo human sikopa sa mga polis dihang mitunol kini og usa ka dakong plastik nga may sulod nga gidudahang shabu ngadto sa poseur buyer nga polis.

Ang maong drogas balor og P120,000 gigamitan lang og budol money sa CIDG7, giingong dunay police asset nga maoy gipaorder sa CIDG ngadto sa supplier ni Apor nga nailhan lang sa ngan nga Pedro nga taga V.Rama Avenue ning dakbayan.

Samtang sa laing bahin ang PDEA7 mihimo usab og kaugalingong buy-bust operation sa duha ka managlahing lugar diha sa barangay Labangon samang adlawa.

Ang nasikop mao sila si Genevieve Juezan,27, taga A. Lopez, Labangon ug Joshua Famador,29,minyo taga Banawa, samtang sa laing ronda nga gidungan atol sa operasyon batok nila ni Juezan duna say buy-bust operation ang PDEA7 diha sa dalan Salvador Extension nasikop usab ang usa ka mabdos og lima ka bulan nga si Riza Faelnar,19.

Nakuha sa PDEA7 mao ang 40 gramos nga gituuhang shabu gikan sa maong mga operasyon.

Sumala pa ni PDEA7 Director, Sr. Supt. Amado Marquez nga si Juezan miyembro sa Pacaña Drug ring nga nag-operate sa maong lugar.