Motor vs motor; 2 namatay

Duha ang patay human magsungag ang duha ka motorsiklo diha sa Barangay Pandacan lungsod sa Pinamungajan niadtong Domingo sa buntag.

Ang namatay giilang sila si Hernani Cabante, hingkod ang panuigon, minyo ug Felicisima Responte, hingkod ang panuigon, kinsa mi-backride sa iyang anak nga si Dario Responte, 27, ang tulo pulos mga molupyo sa maong lugar.

Sumala pa ni PO1 Jocelyn Canonigo sa Banat News base sa imbestigasyon ni PO3 Romeo Jaranilla nga gikan sa managlahing direksyon ang duha ka motorsiklo, ang mga Responte luwan sa kolor blue nga Crypton padulong na pauli gikan sa merkado samtang ang gisakyan ni Cabante mao ang pula usab nga Crypton padulong sa Poblacion.

Segun pa ni Canonigo mi-overtake unta si Dario sa traysikol diha sa unahan apan ang maong traysikol kinsa duna say gilikayan nga tinapok nga balas sa dalan milikay usab maong nasulod hinuon si Dario sa pikas lane.

Nianang tungora wala siya makabantay nga nagpadulong usab si Cabante sa ilaha hinungdan sa pagkasampak sa duha ka motorsiklo, patay diha-diha si Cabante samtang gidala ang manag-inahang Responte sa tambalanan apan gideklarar nga dead on arrival ang inahan ni Dario.