Palpak nga strike idayon sa Sept. 21

Ihinayon sa Alliance of Transport Operator Member Intra City (ATOMIC) karong Septiyembre 21 ang napalpak nga transport strike nga ilusad unta sa Nagkahiusang Drayber sa Sugbo (NADSU) kagahapong adlawa.

Gibutyag sa presidente sa ATOMIC Rudy Laconza dihang nahinabi sa Banat News nga imbitahon gihapon nila ang NADSU nga mosalmot niining mas halapad ug mas preparado nilang welga karong petsa 21.

Gibutyag ni Laconza nga ang giumol nga Labor Power Council (LPC) human ibasura ang impeachment complaint batok ni Presidente Gloria Arroyo maoy mangulo sa maong welga ug ingon man ang mga militanteng pundok sama sa Sanlakas ug uban pa.

Gibutyag ni Laconza nga duna nay pito ka rota nga ilang nakumbinser nga mosimpatiya sa maong welga nga gitumong sa panawagan alang sa pagpa-resign ni Presidente Arroyo, pagbabag sa implementasyon sa expanded value added tax (EVAT), pagbasura sa Oil Deregulation Law ug ang pagpabor sa pagatukoron nga Transitory Revolutionary Government.

Ang LPC magtukod og lainlaing mga council sa matag siyudad sa Mandaue, Lapu-Lapu, Talisay ug dakbayan sa Sugbo aron maoy mopasabot sa tanang mga isyu.

Gipadayag ni Laconza nga ilang paningkamutan nga maparalisar gyud ang tanang mga rota ning maong welga nga magsugod sa alas 4:00 sa kaadlawon ug matapos sa pagka alas 12:00 sa udto sa maong adlaw.

Gipasabot ni Laconza nga mao kiniy hinungdan nga dili sila interesado nga mosalmot sa welga sa NADSU nga plano untang ipatuman kagahapon gumikan kay gawas nga wala sila mapahibalo niini atrasawo na usab ang pagpangandam.

Nasayran nga inay mopahigayon og welga kagahapon nausab ang baruganan sa NADSU ug mipahigayon na lang kini og caravan nga nagduso gihapon sa nahisgutang mga demanda sama sa giduso sa ATOMIC ug LPC.