Policewoman gipatay sa bana nga polis

Patay ang usa ka policewoman human kini dunggaba makadaghang higayon sa iyang banang polis ra usab gumikan sa pagmagahi niini nga manguli didto sa ilang lugar sa Pagadian City niadtong Domingo sa hapon.

Ang biktima giilang si PO2 Luchelle Tejano,25, sakop sa Family Gender and Juvenile Sensitivity Section sa Police Regional Office 7 kinsa nagpuyo diha sa Gotianuy Apartment sa atbang sa PRO-7 ning dakbayan human kini gidunggab ni PO1 Karl Lou Tejano, sakop sa Pagadian City Police.

Si SPO3 Zenaido Pastorfide sa pakighinabi sa Banat News mitug-an nga niadtong milabay'ng buwan pa madestino ang biktima dinhi apan niadtong Hulyo 15 pa unta ang "effectivity" sa order niini nga ibalhin dinhi.

Sumala pa ni Pastorfide nga "battered wife" ang biktima base usab sa asoy sa ig-agaw mismo sa suspek nga si Maryjane Paño kinsa maoy yaya sa anak sa magtiayong polis nga usa pa ka tuig.

"Sige lagi kuno ning biktima og kulata sa iyang bana mao gani nga mipabalhin dinhi aron molikay, unya adtong adlawa gusto man gyud sa lalaki nga manguli sila didto sa Pagadian pero di man gyud mosugot mao to sigurong hinungdan," asoy pa ni Pastorfide.

Giingong miabot ang suspek diha sa ilang gipuy-an ug nagdala na kini og kutsilyong "rambo" ug mihulga kini sa biktima nga kun dili kini mokuyog pagbalik sa Pagadian iya kining patyon.

Niadtong hitaboa kalit nga misaka ang biktima didto sa lawak sa usa ka boarder sa balay nga si Patrick Antig aron unta manirado sa lawak niini dihang gigukod kini sa suspek apan pugsanong giablihan sa suspek ang pultahan maong midagan pagawas si Antig uban ni Paño aron pagpangayo og tabang.

Apan pag-abot nila ni PO3 Dominador Apa ug Edmund Tempo wala na diha ang suspek ug samaran na si Luchelle maong gidali nila kini og tabang paingon sa Cebu City Medical Center apan gideklarar kining dead on arrival sa mga mananambal.

Ang mga sakop sa Crime Suppression Unit, Mobile Patrol Group ug ubang mga police units daling mipangita sa suspek apan wala na kini maabti bisan na didto sa pantalan.