Ang mga gidakop giilang sila si Miraflor Lerio, 25, lumad nga taga Saranggani Province ug ang kapuyo niini nga si Relly Arellano, hingkod ang panuigon ug lumad usab nga taga Iloilo.
Sumala pa sa kapolisan, ang maong bata nga usa pa ka buwan ang pangidaron anak ni Ailene Aniban,29, molupyo sa San Miguel Apas kinsa sikbit ang balay sa gipuy-an sa mga suspek nga gipanag-iya ni Virginia Baldoza.
Didto na maabti sa mga sakop sa 7th PNP Maritime Group pinanguluhan ni SPO4 Virgilio Paragas sa sulod sa barkong M/V Asia Philippines sa Pier 5 nga paingong Saranggani ang mga suspek diin si Lerio maoy giingong nagkugos pa sa bata dihang naaktuhan sa mga polis.
Si Mabolo Police Station investigator Jack Jacalan mitug-an sa Banat News nga adto pang alas 10 sa buntag gikuha sa mga suspek ang bata diha sa balay niini ug gidala sa pagpamalit og mga sinena.
Matud pa ni Jacalan nga buot lang dad-on sa duha ang bata kay buot nilang naa silay anak dugang pa niini gikatahong nanabi pa si Lerio nga duna sad silay anak.
"Dad-on lang daw nila sa ila kay gusto silang magkaanak, nanabi man kuno ang babaye nga naa na siya'y anak," asoy pa ni Jacalan.
Giingong bag-ohay lang miipon si Lerio diha kang Arellano kinsa mipuyo usab sa balay ni Baldoza. Apan natingala na lang ang ilang mga silingan dihang nakit-ang nanglakaw ang duha dala ang bata ug may dalang mga bagahe.
Ang inahan sa bata nga namasin sa mga pantalan nagpauban sa mga sakop sa PNP Maritime ug mitagsa-tagsa sa mga barko nga molargahay anang gabhiona ug tuod man nasigpatan gyud ang duha alas 3 sa hapon diha sa maong barko hinungdan sa ilang pagkasikop.
Kasong kidnapping maoy giandam sa kapolisan alang sa duha kinsa parehong gitanggong karon sa karsel sa Mabolo Police Station.