1 lalki gi-'salvaged'

Usa ka lalaking gituuhang gi-"salvaged" napalgang nadugta na ang patay'ng lawas diha sa kalibunan sa bungtod sa Sitio Tanguili barangay Busay ning dakbayan niadtong milabay'ng Biyernes sa udto.

Giila ang biktima pinaagi sa nakuhang lisensya niini sa pagmaneho diha sa iyang pitaka nga mao si Joselito Bordalba, 36, minyo, taga dalan Cortez sa Wireless dakbayan sa Mandaue.

Ang biktima dunay duha ka samad pinusilan sa iyang agtang ug luyo sa ulo, gisubay pa karon sa kapolisan kun buhi pa kini dihang gidala sa lugar ug didto na gipusil o patay naba kining daan ug gilabay na lang sa maong lugar.

Usa ka Roger Binaro,15 anyos nga molupyo sa maong barangay ang nakakita kang Bordalba diha sa kilid sa bungtod diin baga kaayo ang sagbot nga diin magkuhaan og "kaka" ang bata.

Sa pagkakita sa biktima daling midagan si Binaro kang Technical Sergeant Ralmecio Espera kinsa maoy caretaker sa View Park sa Centcom duol sa maong lugar.

Ang Homicide Section sa Cebu City Police Office mihimo na og dugang imbestigasyon sa kaso aron pagtino sa gidangatan sa biktima ug ingon man ang hinungdan nganong gipatay kini ug giunsa niini pag-abot sa maong lugar. Wala pa usab matino kun duna ba kini rekord sa bilangguan.