Biyuda naglutaw na lang sa dagat

Usa ka patay'ng lawas sa usa ka biyuda napalgang wala nay kinabuhi nga naglutawlutaw sa kadagatan sa Barangay Poblacion lungsod sa Alcantara niadtong milabay'ng adlaw.

Ang maong biyuda giila nga si Laurita Tomaquin, 75 anyos molupyo sa barangay Cabadiangan sa naasoy'ng lungsod.

Ang barangay Poblacion may gilay-on nga napulo ngadto sa 15 kilometro gikan sa barangay Cabadiangan.

Si SPO3 Abec Cultura nga nakahinabi sa Banat News miasoy nga si Tomaquin milakaw sa ilang balay alas dose sa tungang gabii padulong sa dagat ug wala na kini nahibalik pa hangtod pagkabuntag.

Gisusi sa usa ka medico-legal ang lawas ug migawas nga wala'y foul play nga nalambigit sa maong kamatayon. Sumala pa nga si Tomaquin gi-ango-ango na ug magpataka na lang og lakaw.