68-anyos naanod sa baha, namatay

Usa ka 68 anyos nga mag-uuma namatay human kini gituohang gianod sa baha ug didto na mapalgi sa kadagatan nunot niining pag-ulan-ulan dinala sa milabay nga bagyong "Kiko" dinhi sa Kabisay-an niadtong nakalabay'ng gabii diha sa lungsod sa Minglanilla.

Giila sa Minglanilla Police ang biktima nga mao si Bonifacio Gimenez, 68, minyo ug molupyo sa Barangay Cuanos sa naasoy'ng lungsod.

Gituohang mitabok ang biktima kinsa nag-uuma diha sa bukid sa Cuanos sa usa sa duha ka mga sapa diha sa ilang barangay atol sa pagbunok sa uwan hinungdan sa pagkaanod niini padulhog ngadto sa dagat.

Usa ka tawag sa telepono nianang Miyerkules sa gabii nadawat sa kapolisan nga nagpahibalong dunay wala mailhing tawo nga nakit-ang gianod diha sa lapyahan sa dagat sa utlanan sa Barangay Tungkil ug Calajuan.

Gidali unta pagdala ngadto sa Minglanilla District Hospital ang biktima apan gideklarar kining patay na, giingong dunay nakit-ang mga pangos sa nawong ang biktima nga gituohang gumikan sa pagka-anod kaniya ngadto sa dagat.

Ang mga kabanay sa biktima mao nay miila kaniya didto sa morge sa tambalanan.

Ang Barangay Cuanos sumala pa sa kapolisan dunay duha ka sapa nga nagsubay gikan sa bukid kini mao ang Pakigne River ug Pinggan River.