6 mayor ug 6 bise-mayor mipirma manifesto vs Sugbuak

Unom ka mayor ug unom usab ka bise mayor sa unang distrito sa lalawigan sa Sugbo mipasaka og manifesto pagsupak sa pag- buakbuak sa Sugbo ngadto sa upat ka probinsiya.

Ang maong manisfesto giaprobahan sa mga mayor ug bise mayor niadtong Septiyembre singko ug gisumiter kini sa milabay'ng adlaw ngadto sa buhatan ni Kongresista Emelio Macias, chairman sa House Committee on Local Government kinsa maoy mipahigayon sa public hearing sa gi-propose nga bill sa pagbuakbuak sa Sugbo.

Si Mayor Socrates Fernandez sa Talisay, Antonio Canoy sa lungsod sa San Fernando, Eduardo Selma sa Minglanilla, Patrick Barcenas sa Carcar, Ferdinand Chiong sa Naga ug Nestor Ponce sa Sibonga ang mga mayor nga milagda sa maong manifesto.

Ang mga bise mayor nga misupak usab mao sila si Aberdovey Belleza sa Talisay, Erico Enad sa San Fernando, Lani Peña sa Minglanilla, Rogelio Montesclaros sa Carcar, Vladimir Chiong sa Naga ug Jonjie Sandigan sa Sibonga.

Matud pa sa maong manifesto nga ang tulo ka bill nga gipasar kabahin sa pagbuakbuak sa Sugbo nakabuhat og kalapasan sa probisyon sa balaod nga nag-ingon: "mother unit shall remain viable or shall not be diminished by a creation of new unit or in instance four new provinces".