Cityhood sa 23 ka lungsod babagan

Gibabagan sa kagamhanan sa siyudad sa Sugbo ang House Resolution No.1 sa kongreso nga nagpabor sa paghimong siyudad sa dili mominos 23 ka mga munisipalidad lukop nasud nga pending karon sa hawanan sa Senado.

Ang mga munisipalidad nga nagtinguhang ma-convert ngadto sa pagka siyudad ang ilang tagsatagsa ka lungsod gilangkoban kini sa lungsod sa Carcar, Naga ug Bogo Cebu, Binalbagan Negros Occidental, Baybay Leyte, Sablayan Occidental Mindoro, San Francisco Agusan del Sur, Pontevedra Negros Occidental, Lamitan Province of Basilan, San Juan, Metro Manila, Tandag Surigao del Sur, Tabuk Kalinga, Batac Ilocos Norte, Borongan Eastern Samar, Claveria Misamis Oriental, El Salvador Misamis Oriental, Opol Misamis Oriental, Catbalogan Samar, Pototan Iloilo, Mati Davao Oriental, Cabadbaran Agusan del Norte ug Guihulngan Negros Oriental.

Ang balaodnon alang sa paghimong siyudad ning nahisgutang mga lungsod giduso kini niadtong petsa 30 sa Hunyo 2001 apan wala mahatagi og pagtagad gumikan sa gipahigayong impeachment proceedings kaniadto batok ni kanhi presidente Joseph Estrada.

Miduso og resolusyon si konsehal Hilario Davide III atol sa sesyon kagahapon nga nagpadayag og pagsupak sa maong tinguha nga paghimong siyudad sa nahisgutang mga munisipalidad samtang dili pa mausab ang naandang sharing scheme sa Internal Revenue Allotment (IRA).

Gipadayag sa konsehal nga angay'ng i-oktaba lang una ang maong tinguha nga paghimong siyudad ning maong mga lugar hangtod nga ma-usab og ma-updated ang sharing scheme sa kasamtangan karung gidawat nga bahin gikan sa IRA sa tanang mga siyudad.

Gipadayag diha sa giduso nga resolusyon sa konsehal nga padayung nagkagamay ang gidawat nga share sa IRA sa tanang mga siyudad matag tuig gumikan sa krisis sa ekonomiya ug sa padayong pagdaghan sa mga munisipalidad nga nahimong siyudad apil na ang siyudad sa Talisay.

Matud sa konsehal nga kining tanan gikabalak-ang moresulta ngadto sa pagka apektar sa mga basic services sa publiko nunot usab sa padayong pagsaka sa populasyon sa matag siyudad.