Padayon ta's trabaho: Gullas

Maisugong giawhag ni Kongresista Eduardo Gullas ang mga kauban niyang magbabalaod sa Kongreso nga magpadayon na sa ilang mga trabahuon sa paggama og mga balaod ug hunongon ang kaguliyang karon.

Ang maong awhag gipalanog ni Gullas atol sa pagdiskurso niya taliwala sa nagpadayong botasyon bahin sa "impeachment complaint," sa kongreso kagahapon sa buntag.

Matud pa ni Gullas nga nabara ang pagtuki bahin sa budget alang sa umaabot nga tuig.

Ang Sugbuanong magbabalaod nagkanayon nga dili angayang mabalda ang mga gimbuhaton sa matag magbabalaod sa pagtuki sa mga napanday nang balaod nga nag-ong-ong karon sa kongreso nga nagpaabot pa nga diskutihon aron kaaprobahan nila.

Sa iyang pagbarog atubangan sa kapin sa 200 ka mga magbabalaod sa ubos balay balaoranan, si Gullas nagkanayon nga nahimong makalolooy ang mga kabos niining higayona.

Kini tungod kay gihimong gubot sa mga magbabalaod nga minoridad ang isyu batok sa Presidente sa nasud.

Gipahinumdom pag-usab ni Gullas nga ang kagamhanan sa nasud, maoy kagamhanan sa pamalaod busa ang balaod maoy angayang mopatigbabaw karon.