Cebu reps, 'Yes;' Clavel 'No' gyud: Pagbasura sa impeachment complaint

Napatay na gyud sa hingpit ug nahimong kaparte nalang sa kasaysayan sa Pilipinas ang gisang-at nga impeachment karong tuiga batok kang Presidente Gloria Arroyo. Samtang usa ra sa mga Sugbuanong magbabalaod ang mibotar pabor sa impeachment sa pangulo.

Atol sa botohay kagahapon sa House of Representatives nakakuha og 158 ka botos ang pagbasura sa impeachment samtang 51 ra ang buot nga ipadayon kini unom usab ang mi-abstain kun wala makadesider.

Kini maoy nahimong konklusyon sa kapin usa ka bulan nga debatihay diha sa House ug mao say katapusan sa kapin upat ka bulan nga kaguliyang sa politika sa nasud.

Atol sa pagbasa sa resulta milanog ang pag-"booo" gikan sa mga pro-impeachment, pipila niini kaubanan nila ni Susan Roces ug Cory Aquino nga tua didto. Kauban nila sila si kanhi DSWD Secretary Dinky Soliman, kanhi Bise Presidente Teofisto Guingona, mga senador nga sila si Jamby Madrigal, Panfilo Lacson ug pipila sa Hyatt 10.

Samtang ang mga magbabalaod gikan sa Sugbo mipadayag sa pagsuporta sa desisyon sa House Committee on Justice nga ibasura ang impeachment, bugtong si 4th District Rep. Clavel Asas Martinez ra maoy nagsolong Sugbuanon nga mibotar aron padayunon ang impeachment ni Arroyo.

Si 1st District Rep. Eduardo Gullas misubli sa naunang mga pamahayag nga limpyong midaog si Arroyo sa iyang distrito ug sa kinatibuk-an sa Sugbo, giklaro usab niya nga dili tikasan ang mga Sugbuanon .

Mileksyon usab siya sa mga kongresista nga ang nasud gidumala pinasikad subay sa balaod ug dili subay sa kung unsay gusto sa pipila lamang.

"We have a government of laws and not of men"asoy pa niini, gihagit hinuon niya ang mga magbabalaod nga angayang sugdan na ang pagtuki sa national budget para sa sunod tuig ug tukion na usab ang daghang mga balaudnon nga giabog-abugan na diha sa Kongreso nga wala maatiman gumikan sa paghikay sa impeachment ni Arroyo.

Samtang si Cebu City North District Rep. Raul Del Mar mipatim-aw nga maong iyang gibutohan ang pagbasura niini gumikan kay ang kinaugatang "Hello garci tape" iligal man gani pagkuha gumikan kay nakalapas kini sa Anti-wiretapping Law, samtang giklaro usab niya nga ang Lozano complaint mao ra gyuy gitugutan sa balaod sanglit kini maoy nag-una kun itandi sa laing duha ka bersyon maong mao kini ang gipasar sa Kongreso.