Shemberg mamalit og bagol

Angay nang mangandam karon ang mga bagolero, kon negosyante'g bagol sa lubi kay atubangon nila ang bag-ong hagit sa ilang panghinabuhi kay may magkinahanglan og tres milyones kilos nga bagol matag buwan dinhi sa Sugbo.

Si Benson Dakay, presidente ug tag-iya sa Shemberg Manufacturing Corporation (SMC), ang kompaniya nga tighikay sa guso aron ibaligya ngadto sa gawas maoy mopalit sa dinaghang bagol gikan sa mga bagolero.

Ang bagol mao nay gamitong sugnod ni Dakay sa iyang mga boiler aron makadaginot, gumikan sa kamahal na sa bunker oil.

Matud pa ni Dakay, ang tanan niyang boiler nga kaniadto gilawgan og bunker oil, sa pagkakaron iyang gikonberter aron kasugnoran na og uling sa bagol.

Maoy hinungdan nga kun mahuman na ang pagpangusab sa maong mga boiler, malagmit magsugod na siyag panawat og bagol sa lubi karong buwan sa Nobiyembre.

Si Dakay nakahukom sa paggamit og bagol dihang gisakitan na siya sa kadagko nga magasto sa paggamit og bunker oil.