Si Central Command Spokesman Lt.Col. Jefferson Omandam mibutyag sa Banat News nga padayong suportahan sa Armed Forces of the Philippines ang konstitusyon ug panalipdan ang katawhan.
Sumala pa ni Omandam nga dili molubad ang AFP sa pagsunod sa mandatus sa Konstitusyon ug miingong usa ka "apolitical" ang institusyon ang AFP ug walay dapigang habig gawas lang kun makamugna na og kagubot.
Sigun pa ni Omandam nga bisan unsay himuon sa mga nagkabingkil nga habig diha sa kadalanan basta dili lang mapaingon sa kagubot ug kaguliyang nga naglapas na sa balaod dili mag-apil -apil ang militar.
Samtang didto sa kauluhan giklaro sa AFP Spokesman nga si Lt. Col. Buenaventura Pascual nga solido ang chain of command sa militar aron paluyohan ang commander-in-chief (Arroyo) ug mihimakak sa mga gipasiatab nga duna na say planong pagpangatake sa mga junior officers sa AFP.
Si Retired Philippine Constabulary Chief Maj. Gen. Ramon Montaño sa sayo pa mibahad nga dunay kaligutgot ang grupong Young Officers Union sa AFP ug PNP ngadto sa administrasyon gumikan sa pagkalambigit sa upat ka tag-as nga opisyal sa AFP sa pasangil nga pagpanikas aron masiguro ang kadaugan ni Arroyo.