Balay gisunog sa 'adik'

Gikatahapang nagumon sa ginadiling drugas gipasanginlan nga misunog sa usa ka balay diin naugdaw gyud kini kagahapon sa kaadlawon diha sa Villa Verna Subdivision barangay Bulacao, dakbayan sa Talisay.

Ang suspetsado mao si Wilfredo Bacolod, hingkod ang panuigon, gidetiner karon sa Talisay detention cell diha sa barangay Lawaan.

Ang balay gipanag-iya ni Gemma Cugtas kinsa tua karon sa Singapore apan iya kining gisalig sa iyang mga igsuon nga si Riza ug Joseph Pardo diin giabangan kini sa pamilyang Bacolod.

Matud pa ni SFO1 Eulogio Abellar, fire investigator sa Talisay nga ang suspetsado nanghuwam og kuwarta ngadto sa manghod niini nga si Daisy Bacolod, 19-anyos kinsa nagdumili sa pagpapahuwam og salapi ngadto kaniya.

Hinungdan nga ang suspetsado nasuko og nanghagis diin giablihan niini ang tangke sa LPG unya gikutayan og taas nga habol dayon giduslitan.

Matud pa ni Abellar nga mikabat sa P150 mil ang danyos sa maong sunog apan giinsister ni Joseph nga P500 mil ang danyos.