1 PATAY, 15 SAMDAN

Usa ang patay samtang 15 ka tawo ang nangaangol sa nahitabong aksidente sa sakyanan niadtong Sabado sa gabii diha sa duha ka barangay sa siyudad sa Talisay.

Ang unang insidente nahitabo diha sa barangay Lawaan uno diin usa ang patay ug 12 ang angol. Ang ikaduhang aksidente, tulo ka tawo ang naangol sa pagkahulog sa trak sa bung-aw sa Campo 6.

Gihulagway sa mga traffic police sa Talisay nga usa ka babaye ang namatay sa aksidente diin adunay 5'2 ang gitas-on, slim ang panglawas, kutob sa abaga ang gitas- on sa buhok niini, nagsul-ob og maong nga short pants ug puti nga t-shirt nga dunay rebete nga blue sa liog ug bukton ug naa karon sa morge sa Minglanilla District Hospital.

Ang dose ka nangaangol nga pasahero dali nga gidala ngadto sa tambalanan.

Ang Calvo bus nga nagtangag sa plakang GWH-278 gimaneho ni Gregorio Aliganga 43 menyo taga barangay Cantoan lungsod sa Naga midaro ngadto sa lubot sa SM bus samtang nagparada kini sa maong lugar para magpasensiyo ang konduktor niini ngadto sa usa ka gasoline station.

Ang SM (dili iya sa department store) bus nga dunay numero sa plaka GVG-735 gimaneho Jeffrey Perater 31, minyo taga barangay Congactol, lungsod sa Dumanjug.

Ang duha ka sakyanan pareho nga dunay rota paingon ngadto sa south diin pulos kini puno sa pasahero.

Base sa imbestigasyon sa kapolisan sa traffic division sa maong siyudad nga ang SM bus gikan sa Cebu city nakiglumba kini sa laing bus nga de pasaheroan paingon ngadto sa habagatan.

Sa laing bahin, tulo usab ka tawo ang nabalian sa bukog human mahagbong ngadto sa bung-aw nga dunay 50 ka tiil ang gilawmon ang gisakyan nila nga trak nga nagtangag sa plakang GGI-906 kargahanan og bas diha sa Camp 6 dakbayan sa Talisay.

Ang mga biktima mao si Gumercendo Largo 34, taga Cantabaco siyudad sa Toledo drayber sa track, Roger Faran 21 anyos taga Guindarohan lungsod sa Minglanilla, truck boy ug Aldwin Herbias 18, ulitawo taga Camp 6 mi-hitch og sakay sa maong sakyanan.

Base sa imbestigasyon sa kapolisan nga si Largo nagmaneho sa nahisgutang sakayanan gikan sa Camp 7 diin ang destinasyon niini ngadto sa Camp 4. Paghiabot sa nahisgutang lugar gipaliko sa wala ni Largo ang trak diin wala na niya mabawi paglubag sa pikas ang manabela hinungdan nga ang trak milahos kini sa bung-aw ug maayong pagkaguba niini.

Laing aksidente sa sakyanan diin patay ang usa ka 65- anyos nga lalaki sa mao gihapon nga adlaw diha sa national highway barangay Bonbon, lungsod sa Oslob.

Ang biktima mao si Tirso Lomonsoc biyudo residente sa maong lugar kinsa milupad una kini mitugpa sa karsada human madumboli sa Isuzu Crosswind nga nagtangag sa plakang GSZ-941.

Ang drayber sa sakyanan giila nga si Romulo Gonesto 33, taga Sityo Pondohan Upper, Beceril lungsod sa Boljoon temporaryo karong gidetiner sa Oslob municipal jail.