Guwardya gisukmag, mikirig, patay

Guwardya nga gidistino sa pagbantay sa gibaradero nga barko ang gisukmag sa wala hiilhing lalaki, mikirig kini ug nahagba sa yuta hangtod nga namatay.

Nahitabo kini alas 2 pasado ang takna sa miaging kaadlawon sa Ouano Wharf sa Tribunal, Centro sa dakbayan sa Mandaue.

Ang biktima mao si Eugenio Berce, hingkod ang panuigon, minyo nga taga dalan A. Lopez sa barangay Calamba sa dakbayan sa Sugbo.

Nasaksihan ang insidente sa ship captain sa M/V Nojaca nga gibaradero sa maong dapit kinsa maoy nagdala sa biktima sa tambalanan.

Si PO3 Miguel Estrada sa kapolisan sa Presinto 1 sa Centro Police Station sa Mandaue City Police Office (MCPO) ang miingon nga nadistino sa pagbantay sa mga barko ang biktima.

Matud pa niya sa ilang imbestigasyon nga giduol ang biktima sa wala hiilhing tawo ug kalit niining gisukmag makausa nga maoy nakaingon sa pagkirig dihang nahagba sa yuta.

Ang kapitan sa M/V Nojaca nga nakakita maoy nakadali pagduol ug dali niining gihatod sa sa Mandaue City Hospital pinaagi sa pagkarga sa biktima sa traysikad apan gideklarar sa mga doktor nga patay na kining nahidangat kanila.