Mituasik ang utok

Mituasik ang utok sa duha ka tawo ngadto sa sementadong karsada human malatayi sa ligid sa prime mover nga nagguyod og trailer ug patay na nga gidala sa tambalanan.

Ang aksidente nahitabo alas 8:45 ang takna sa miaging Huwebes sa gabii sa atubangan sa San Miguel Corporation nga nahimutang sa dalan M.C. Briones sa barangay Guizo, siyudad sa Mandaue.

Giila ang mga biktima nga mao sila si Vicente Apa, 56, minyo nga taga Sangi Interior, Gun-ob, siyudad sa Lapu-Lapu ug Allan Olidan, 24, ulitawo nga taga

dalan T. Villa, dakbayan sa Sugbo.

Si Judiuto Barrita, 32, minyo nga taga dalan Echevarre sa barangay Mantuyong sa Mandaue maoy nagmaneho sa prime mover nga nagguyod usab og trailer nga nakadasmag patay sa mga biktima.

Mitahan kini kang SPO2 Genaro Lambayan sa traffic section sa kapolisan sa maong dakbayan kinsa maoy dali nga nakatubag sa maong alarma ug gitanggong kini sa bilanggoan.

Si Lambayan nga gikahinabi sa Banat News ang miingon nga gikan sa flyover sa Maguikay ang prime mover nga gimaneho ni Barrita.

Samtang ang motorsiklo nga gimaneho ni Apa ug sa angkas niining si Olidan ang gikan pa gayod nga migawas sa Caltex gasoline station ug kalit lang nga nadagit sa prime mover nga kusog usab nga nagdagan.

Dali unta nga gitabang sa pipila ka motorista ang mga biktima apan ang mga doktor mideklarar kanilang patay na nga nahidangat kanila.