Dunay organisasyon kadawat gikan Pagcor

Giangkon kagahapon sa tigpamaba sa Arsodiosiso sa Sugbo Msgr. Achilles Dakay nga kaniadto dunay mga ahensya kon organisasyon sa simbahan nga nagdawatan og mga donasyon gikan sa Philippine Amusement and Gaming Corporation sa wala pa giuso ang lotto.

Si Dakay mitug-an sa interbyu sa lokal nga sibyaanan nga ang mga nadawat gikan sa PAGCOR ug Philippine Charity Sweepstakes Office Pagcor gigamit sa maong mga organisasyon sa ilang mga "charitable projects" niadtong ang sweepstakes pa ang legal nga sugal sa nasud apan pag-uso sa Lotto giundang na kini.

Ang simbahan kusganong mibabag sa bisan unsang legal ug ilegal nga sugal sa nasud. Apan ang gobyerno bisan tuod sa pamahayag nga pakigbatukan ang ilegal nga mga sugal ilabi na ang jueteng namatikdang gipaninguha usab kini nga mahimong legal pinaagi sa "Bingo Combo" nga giulan na sad karon og mga pagsaway.

Samtang gibutyag ni Dakay nga manubag gyud si Caloocan Bishop Deogracias Enuigues sa Catholic Bishops Conference of the Philippines (CBCP) kalabot sa gitug-an niini nga dunay mga panahon nga modawat sila (ang iyang prelatura) og donasyon gikan sa Pagcor apan gigamit kini sa ilang Social Action Center nga naghatag og tabang sa mga kabus.

Sumala pa ni Dakay nga ning gihimo ni Enuigues bisan sa maayo gigamit ang kuwarta, susama ra nga gitugotan sa simbahan ang maong mga sugal nga sa pagkakaron maoy init kaayo ang isyu.

Ang isyu sa pagdawat sa mga simbahan og mga donasyon gikan sa Pagcor ug PCSO mibutho human si kanhi Social Welfare Secretary Corazon Dinky Soliman mibutyag nga atol sa kainit sa isyu sa sugal nga jueteng nga naglambigit kang First Gentleman Mike Arroyo dunay mga sakop sa kabinete ni Arroyo ang mihatag og suhestiyong ipataktak si Head Efraim Genueno kinsa suod sa First Gentleman, apan gikatahong wala motugot sa suhestiyon ang pangulo kay matud pa si Genuino maoy nag- "take care" sa mga obispo ug mga sakop sa media.

Ang Pagcor mihimakak sa maong pabuhagay ni Soliman ug miingong dunay dokumento ang tanang transaksyon niini ug gisumiter kini ngadto sa Commission on Audits.