CSU nay motubag sa alarma

Gihatagan og gahum ni Mayor Tomas Osmeña ang Crime Supression Unit (CSU) nga maoy mo-responde sa mga alarma nga motumaw dinhi sa palibot sa dakbayan sa Sugbo.

Kini human gitug-an ni Osmeña nga daghan na siya og mga reklamo nga nadawat kabahin sa dili epektibong pagresponde sa Mobile Patrol Group (MPG) sa mga motumaw nga alarma.

Matud sa mayor nga gimando na niya ang imbestigasiyon kabahin sa maong alegasiyon batok sa MPG aron gyud mahibaw-an ang matuod ug ang resulta niini maoy himuong basihanan pagpangita ug paagi aron dili na masubli ang maong mga kapalpakan.

Gani kini maoy usa sa hinungdan nga iyang girekomendar ang pagparelibo sa kanhi hepe sa MPG Supt. Hernan Lungayan nga karon ibalhin na ug distino sa Carbon Police Station.

Ang nakaaghat sa mayor pagparelibo kang Lungayan mao ang pagkamatay sa duha ka mga polis nga sila si PO2 Armando Juegos ug PO2 Oliver Jamboy nga napusilan patay human makailog og armas ang gi-respondihan niining naghuramentado nga tawo didto sa Nevill Hills Lahug niadtong milabay'ng Domingo sa gabii.