Ban sa private cars di paboran kun....

Dili pabor ang ubang transport group sa Sugbo sa laraw nga pag-ban sa mga pribadong sakyanan panahon sa rush hour dinhi sa dakbayan kun ugaling ang bugti niini mao ang dili pagpaningil sa dugang peso nga umento sa minimum nga plitehan.

Gibutyag sa presidente sa Alliance of Transport Operator Driver's Member Intra City (ATOMIC) Rudy Laconza nga mas labing maayo nga wala lang untay kondisyon ang pagpatuman sa maong laraw gumikan kay kaniadto pang nagping-it silang mga drayber sa kanunay lang pagsaka sa presyo sa produktong petrolyo.

Gikabalak-an sab ni Laconza nga mosamot lang ka lugi ang kita unya kanilang mga drayber kun dili mahimong epektibo ang maong paagi.

Hinuon gisugyot sa ATOMIC nga mas maayong mopatuman lang una ug ekspiremento niining maong laraw aron maoy himuong basihanan kun epektibo ba ang maong lakang.

Pipila ka mga lugar nga giplanohan sa mayor nga i-ban ang mga pribadong sakyanan panahon sa rush hour mao ang Mango Avenue, Osmeña Boulevard, Colon ug uban pang rota depende sa i-rekomendar unya sa mga drayber.

Una nang gipadayag ni Mayor Tomas Osmeña ang kaandam pagpatuman ning maong sistema aron matabangan ang mga drayber nga makabayad sa ilang abangan ug makaganansiya nunot ning padayung pagsaka sa presyo sa gasolina.