Giposasan, gitionan sa mga polis

Lalaki nireklamo nga giposasan ug gitionan og armas atol sa gipahigayon nga ronda sa kapolisan sa Fuente Osmeña didto sa Sitio Lower Kawayan, B. Rodriquez ning dakbayan.

Personal nga mireklamo sa Fuente Osmeña Police Station si Eufemio Ding-ding, 37 anyos human gironda ang iyang panimalay kagahapon sa kaadlawon. Matud pa sa alegasyon ni Ding-Ding nga kalit lang nga misulod sa ilang panimalay ang tulo ka polis inubanan sa barangay tanod.

Matud pa ni Ding-Ding nga gitionan siya og armas sa usa ka polis nga si SPO1 Elmo Rosales ug giposasan sa barangay tanod nga si Romeo Bonayre sa pagtuo nga siya ang suspetsado. Apan sa dihang diha na sila sa hayag nga lugar nadiskubrehan nga dili diay mao ang ilang gipangita sa dihang naklaro ang nawong ni Ding-ding.

Ang kapolisan sa Fuente Osmeña mipasabot nga diha sila'y nadawat nga tawag gikan sa usa ka residente sa nahisgotang barangay nga adunay armadong tawo maong dali kini nilang girespondehan. Sa maong higayon nakit-an nila ang suspetsado nga midagan padung sa panimalay sa maong tawo nga nasaypan hinungdan nga ila kining gisulod.

Si SPO1 Rosales sa pakighinabi sa Banat News mihimakak sa pasangil nga siya nanion kundili mibunot lang siya daan sa iyang armas kay gikunsiderar ang gipangita nga armado.

Siya nagkanayon nga ang ilang gipangita mao si Romeo Rico kinsa giingong drug-pusher, tulisan ug nakapatay na og kapuyong GRO nga taga Davao kaniadto.

Gikatahong niadtong milabay'ng semana ang kakontra ni Rico nga naila lang sa ngan nga Sander nagpinusilay maong nabalaka ang mga molupyo.