Badjao di angay ibalhin sa Tongo island-OMA

Mga kadagkuan sa muslim dinhi sa lalawigan mihangyo nga dili lang ibalhin ngadto sa Tongo Island ang mga muslim nga Badjao ug adto nalang kini ibutang sa usa ka bakanteng lote nga giingong gipanag-iya sa dakbayan diha sa barangay Pardo ning dakbayan.

Ang Office of Muslim Affairs Regional Director Sakiran Hajan sa pakighinabi sa mga tigbalita kagahapon nagkanayon nga ilang hangyuon si Mayor Tomas Osmeña pinaagi sa suwat nga dili nalang ihinayon ang pagpabalhin sa 45 ka pamilya sa mga Badjao.

Giisip sa mga muslim nga si Osmeña isip ilang Sultan makahatag sa ilang hangyo gumikan usab sa maayong relasyon sa ilang buhatan ug sa mayor.

Gihangyo usab ni Hajan nga hatagan og tag 32 metro kwadradong luna ang matag pamilyang Badjao diha sa nahisgutang luna nga gitagana sa dakbayan alang sa socialized housing project sa City Division for the Welfare of the Urban Poor.

Samtang atol sa linagdaay kagahapon sa donation of deeds sa duha ka ektaryang luna sa Barangay Guba nga himuong sam-ang sa mga muslim mitunol og proposal si Hajan kang National Anti Poverty Commission Secretary General Zamzamin Ampatuan aron tabangan ang 45 ka pamilyang Badjao nga punduhan ang tukorong mga balay kun tugutan ni Osmeña nga diha sa Pardo sila pabalhinon.