Drayber ni Gayotin wa ikiha

Wala dayuna og pasakag kasong Reckless Imprudence Resulting to Physical Injuries ang drayber ni Acting City Police Director Melvin Gayotin nga si Jose Gerry Leonardo sa aksidenteng napusilan niini niadtong milabayng adlaw.

Ang biktima nga napusilan mao si Teresa dela Peña ug bana niini nga si Lolito makig-areglo nalang sa kaso apan mihangyo nga dili na padad-on og pusil si Leonardo ug tubagon ang galastuhon sa tambalanan.

Si Gayotin sa iyang bahin nagkanayon nga iya ng ipabalhin ngadto sa Mobile Patrol Group si Leonardo gumikan sa pagkaskasero niini kun momaneho para niya.

Si Dela Peña napusilan samtang luwan sa usa ka pasaheruang PUJ diha sa may dalan M.J Cuenco dihang dunay gigukod si Leonardo nga usa ka 16 anyos nga inatser nga bag-uhay lang niyang nakitang milabni sa ariyos sa usa ka babaye.

Ang suspek mikabyon sa PUJ nga gisakyan ni Dela Peña apan naapsan kini sa Leonardo ug dihang misuway kini og palag gikatahong gihapsan kini ni Leonardo og pistola apan mibuto kini ug naigo si Dela Peña diha sa likod.