90 na ang gipatay

Miabot na sa 90 ka tawo ang biktimang gipamatay sa mga gidudahang vigilante gitumba sa milabayng gabii diha sa dalan Sabellano Barangay Quiot ning dakbayan samtang kini nagkabyon sa multicab nga pasaheruan.

Giila sa Homicide Section ang biktima mao si Romeo Allera, hingkod ang panuigon, gikatahong taga Taboan ning dakbayan kinsa nakaangkon og daghang pinusilan sa lawas, ulo ug tiil.

Sumala pa sa imbestigasyon sa kapolisan ang biktima luwan sa usa ka multicab padulong sa Punta Prinsesa dihang misunod ang duha ka wala mailhing tawo nga nagsakay og motorsiklo.

Pipila sa mga report nag-ingong gibadlong pa ug gipapakanaog ang biktima sa mga suspek diha sa gikabyunan niini apan gikatahong wala kini mopatuo maong ang mga suspek mipusil kaniya sa likod.

Dihang nahagbong si Allera sa dalan , diha-diha giusban kini sa mga suspek og pusil hinungdan sa hinanali niining kamatayon.Daghang mga basiyo sa bala sa pistola ang narekober diha sa crime scene.

Nahibaw-an nga alas 6:15 sa hapon gibuhian si Allera sa Pardo Police Station sumala pa ni PO3 Rene Baral, gumikan kay wala moanha ang reklamante niini nga si David Patrimonio, taga Sitio Ubka barangay Quiot ning dakbayan kinsa iyang gikawatan og cellphone niadtong alas 12:45 udto Agosto 23.

Pila ka minutos ang milabayng human kini gibuhian napusilan kini ug napatay sa mga gidudahang vigilante.