Combo bingo ihulip sa jueteng babagan

Kusganong gisupak ni Cebu Archbishop Ricardo Cardinal Vidal ang iyang pagsupak sa gihungihong nga pagpauso sa sugal nga "Bingo Combo" nga pasiugdahan sa Philippine Amusement and Gaming Corporation base sa pasiatab ni Lengayen Archbishop Oscar Cruz.

Si Vidal nagkanayon sa mga tigbalita nga ang simbahan hugtanong misupak sa bisan unsang matang sa sugal ug nakapadangat na og pastoral letter ngadto sa mga parokya dinhi sa lalawigan sa Sugbo.

Ang Bingo Combo base sa pasiatab ni Cruz susama ra sa sugal nga jueteng apan kun ang PAGCOR ang mopatuman niini mamahimong ligal na kini nga sugal nga mosukwahi sa panaad ni Arroyo.

Ang Malacañang niadtong milabayng adlaw namahayag pinaagi ni Ignacio Bunye nga dili makakuhag suporta ang maong bag-ong sugal gikan sa pangulo sanglit gimando man gani ni presidente Gloria Arroyo ang pagpapas sa iligal nga sugal sa nasud.

Samtang si Mayor Tomas Osmeña namahayag usab nga dili siya mouyon niini sanglit kini maoy makahimo sa kapolisan nga mosamot og kakurap lakip na ang mga lokal nga opisyal.

Bisan gani ang kabataan mahimong maapektahan sa impluwensya niini ug dili kini maayong talan-awon sa katawhan.

Ang maong sugal sa paghulagway ni Senador Panfilo Lacson mohatag og 80 porsiyentong bahin ngadto sa mga mayor gikan sa kinitaan niini samtang 20 porsiyento lang ang sa PAGCOR.

Kahinumduman nga si Arroyo mimando nga kutob karong Septembre 15 ang tagal sa anti jueteng task force nga gipanguluhan ni Puerto Prinsesa City Mayor Edward Hagedorn nga wagtangon kini.