10 GRO gisikop

Mokabat sa napulo ka mga guest relation officer sa gipangronda nga mga balay kalingawan gipangsikop atol sa kalit nga pagpangronda sa kapolisan ug mga inspektor sa kagamhanan sa dakbayan sa Lapu-Lapu.

Ang pagpangronda natigayon sa miaging gabii sa pipila ka mga balay kalingawan sa maong dakbayan ug nasuta sa pakisusi nga gihimo nga daghan og mga nahimong kalapasan sa mga rikisito nga gilatid sa ordinansa sa siyudad.

Ang mga inspektor sa kagamhanan sa maong dakbayan nga gipangulohan ni City Administrator Teodelo Ybañez ug mga sakop sa kapolisan mihimo sa ilang pagsusi sa tanang balay kalingawan ug nasuta nga ang pipila niini kanila nakahimo og mga kalapasan.

Naglakip sa mga kalapasan sa ordinansa ang kapakyas pagbaton og hygiene sa mga GRO sa City Health, samtang walay mayor's permit, sanitary permit ug business permit ang imnanan.

Ang nadakpan nga mga GRO nga giditiner sa kapolisan sa ilang buhatan ug gikatakdang pasakaan og kaso kinsa hatagan lamang kini og kagawasan kun makabayad na kini sa multa sa kalapasan nga ilang nahimo.