14-anyos babaye may warrant na, gidakop

Gisikop kagahapon sa buntag pinaagi sa warrant of arrest ang usa ka 14-anyos nga batang babaye kinsa gipasanginlan nga namun-og sa usa ka 9-anyos nga kaduwa niini.

Ang maong insidente sa pagpamun-og nahitabo niadtong milabay'ng tuig diha sa Sityo Mahayag, barangay Cansojong dakbayan sa Talisay.

Ang biktima mao si Kimberly Sasa samtang ang gidakop kay namun-og niya mao si "Lyn" (nganlan gipugngan) kinsa gipasanginlan nga milabay og gawong sa balde ngadto sa biktima ug maoy nakaingon nga nagisi ang tuo nga kilay niini.

Dala ni SPO2 Jerome Abatayo ang warrant of arrest nga giluwatan niJudge Raphael Yrastorza Jr. sa Branch 14.

Si Abatayo nagkanayon nga si Sasa ug Lyn nagkuyog kini diin gilili sa duha ang iyaan ni Sasa ug ang uyab niini nga nag-date.

Ang duha gigukod sa iyaan ni Sasa ug misangpot sa paglabay sa suspetsado sa nahisgutang gawong sa balde ngadto sa iyaan sa biktima apan ang biktima maoy naigo.

Matud pa ni Abatayo nga si Lyn wala makaila sa iyang mga ginikanan ug walay mga kaparyentehan nga nag-atiman niini diin wala usab kini klaro nga kapuy-an.

Pagpanag-ob og tubig ug pagpanglabada maoy panginabuhian ni Lyn.

Si Lyn gitugyan sa mga polis ngadto sa Department of Social Welfare and Development (DSWD) sa siyudad kagahapon sa buntag.