Nanglaba gipusil

Wala makatiwas sa iyang pagpanglaba ang usa ka lalaki sa dihang gipusil sa iyang silingan sa Sitio Bacay, Barangay Tulay lungsod sa Minglanilla.

Wala nay kinabuhi nga milandig sa tambalanan ang biktima nga si Jason Estrera, 22 anyos, lumad nga taga Camotes ug kasamtangang nanimuyo sa nahisgotang dapit.

Sa pasiunang imbestigasyon sa kapolisan sa Minglanilla, ang biktima nanglaba duol sa ilang balay ug kalit miabot ang usa ka Edzel Franza ug dayong pamusil sa makadaghan nga higayon gamit ang .9m pistol.

Si PO4 Sabellano sa Minglanilla Police Station sa dihang nahinabi sa Banat News nagkanayon nga wala gyod sila'y mahatag nga impormasyon kabahin sa motibo sa maong pagpamusil hinuon padayon pa nilang giimbestigar ang maong kaso ug alerto usab sila sa pagpangita sa mamumuno sanglit dali kining naka-eskapo human sa maong hitabo.