Gi-atake gihulog sa patrol

Duha ka mga sakop sa Mobile Patrol Group gipasanginlang nangulata ug mihagbong gikan sa sakyanan sa tawong buot magpahatod kanila ngadto sa tambalanan human kini atakiha sa pagpanakit sa dughan sulod sa sinehan niadtong milabay'ng Sabado sa hapon.

Ang biktima kabanay sa hepe sa Consolacion Police Station nga si Sr.Insp. Claro Benatiro sa pakighinabi sa Banat News kagahapon diha sa operations division sa Cebu City Police Office.

Giila ni Benatiro ang biktima nga mao si Benjamin Dublin, 51 anyos, lumad nga taga Barangay Tapilon, Daanbantayan. Si Dublin usa ka vendor og buwak sa Freedom Park sa Carbon Market.

Sigun pa ni Benatiro nagtan-aw si Dublin og sine diha sa usa ka sinehan sa Colon niadtong Sabado sa hapon dihang giatake sa pagpanakit sa dughan maong ang guwardiya nga si Richard Olmos gikatahong maoy mitabang sa biktima ug mitawag sa Hotline 166 sa MPG.

Apan matud pa sa opisyal wala makuha sa guwardiya kun si kinsa kadtong maong mga polis luwan sa Patrol Car sa MPG ingon man ang body number sa police car.

Giingong miabot usab ang duha ka pag-umangkong babaye sa biktima kinsa gipatawag sa guwardiya subay sa hangyo ni Dublin apan wala sila manguyog sa mga polis aron paghatod sa Cebu City Medical Center sanglit moapas na lang sila didto.

Sumala pa usab ni Benatiro nga imbes kuno sa CCMC, gidala hinuon sa mga polis si Dublin diha sa dalan Martires sa Baranghay Tejero duol sa taytayan ug didto gikulata sa dakuon og lawas ug itomon og pamanit nga polis kinsa mipasangil usab kaniya nga kawatan ang biktima, samtang ang batan-ong gidudahang PO1 pa ang ranggo wala mosanta sa kauban niini.

Giingong human niadtong gihagbong si Dublin sa duha diha duol sa taytayan ug mibiya, si Dublin gumikan sa pagsumbag diha sa iyang tiyan nawad-an kini og panimuot diha sa gihabungan kaniya, kagahapon sa buntag na kini nakamata ug mikamang nga nangayo'g tabang sa mga molupyo ug gidala sa CCMC.

Si Benatiro kinsa kanhi sakop sa Internal Affairs Service sa Police Regional Office nagkanayon base sa alegasyon sa biktima gikinahanglan dayon ang "moto proprio investigation" ug kun pormal nga moreklamo ang biktima ilang hangyuon si Supt.Melvin Gayotin sa paghimo og police line up sa mga nag-duty nianang adlawa sa MPG.

Asoy pa ni Benatiro nga wala sa blotter sa MPG ang insidente dihang iyang gisusi apan didto natala sa logbook sa guwardiya nga si Olmos.