SRP police car misirko, 2 angol

Misirko-sirko sa hangin ug misampak sa usa ka balay ang patrol car sa Cebu City Police Office nga gitahasang mobantay sa South Reclamation Project (SRP) human kini migukod sa usa ka tawong kadudahan ang lihok luwan sa usa ka motorsiklo niadtong Biyernes sa buntag.

Nangalandig sa tambalanan mao sila si PO1 Nathaniel Lumacad ug police asset nga si Romulo Diano Jr. pulos mga sakop sa Criminal Investigation and Intelligence Branch sa CCPO.

Sigun pa sa imbestigasyon ni SPO1 Nelson Jayme sa Traffic Group sa CCPO ang kasamtangang nagpatrolya sa maong lugar dihang dunay miaging usa ka motorsiklong kadudahan ang tawong luwan niini.

Dihang ilang gipara gikatahong mipasutoy kini og padagan ikyas padulong sa Talisay City hinungdan sa ginukdanay. Apan pag-abot sa may barangay Laray sa naasoy'ng dakbayan nakaagi og balason nga dalan ang patrol car hinungdan nga nawad-an og kontrol si Lumacad.

Nianang tungora misirko-sirko ang sakyanan makadaghang higayon ug didto misampak sa konkretong balay nga gipanag-iya ni Myrna Marabe, taga Hidden Plains Barangay Talamban ning dakbayan.

Wala pa kini mohunong gumikan sa kakusog nalahos pa kini sa giparking nga traysikad diha sa sidewalk una pa molandig nga naghayang sa agianan sa mga tawo daplin sa dalan.

Ang mga lumalabay nga concerned citizen nga dunay mga sakyanan maoy mitabang sa duruha og pagawas sa patrol car ug daling gihatud sa tambalanan.