Ang maong mga ER nga nakuha sa kapolisan giingong maoy ebidensya sa oposisyon ug ni Loren Legarda batok ni Presidente Gloria Arroyo ug Bise Presidente Noli De Castro nga pagpanikas, kahinumduman nga ang Sugbo maoy nakahatag og dakong botos alang sa kadaugan sa duha niadtong milabay'ng piniliay.
Si Legarda nangangkon nga si Tabayoyong maoy iyang testigong mopamatuod nga duna gyuy tikas nga gihimo si De Castro maong kini midaog batok kaniya. Si Tabayoyong mao sad ang testigo kaniadto ni Senador Panfilo Lacson nga misupak sa resulta sa mga eksperto sa PNP Crime Laboratory kalabot sa gilalisang pirma ni Jose Pidal ug bana sa pangulo nga si Mike Arroyo.
Si Burgonia sa pakighinabi sa Banat News sa iyang bahin nagkanayon nga sa pagkakaron nga wala pay specific nga reklamo batok sa iyang mga maestra ug specific nga presintong gitumbok diin nahitabo ang giingong pagpanikas wala siyay himuong imbestigasyon sa mga magtutudlo.
Gidepensahan ni Burgonia ang mga magtutudlo nga kun duna may sayop nga nahimo wala kini tuyoa sa mga maestra gumikan sa kahapo na sa lawas sanglit sayo kaayo nagsugod ug dugay kaayong natapos ang botohay ilabi na kun dunay mga reklamong masinati.
Sa sayo pa ang oposisyon nangangkong sa ER nga ilang ebidensya dunay mga anomalya sa ink nga gigamit sa pagtamla sanglit giingong dili kini ang opisyal nga ink sa Comelec, ingon man dunay walay mga tamla, lagda ug uban pang gidudahan nilang timailhan nga dunay tikas nga gihimo ang administrasyon.