Armas, bala, drugas nasakmit

Mga nagkalain-laing mga granada, bala, armas ug drugas nasakmit sa kapolisan sa Consolacion. Hastang hepe nabun-og dihang nakiglayog sa suspek nga giingong lider sa grupo sa mga adik nga miibot na sa pin sa granada atol sa gihimong ronda diha sa Barangay Tilhaong lungsod sa Consolacion kagahapon sa kaadlawon.

Wala kaugpo ang suspek nga si Eucencio Pasilang, 27, minyo ug molupyo sa maong lugar kinsa gihulagway nga notadong tigtumod og drugas sa ilang dapit ug maoy lider sa mga manuyupay sa ilang lugar.

Si Sr.Inspector Claro Cuyos Benatiro uban nila ni SPO3 Hercules Aligno, PO2 Ernesto Pepito Jr. ug PO1 Reybert Abawan mihimo og pagpatrolya sa maong lugar gumikan sa reklamo sa barangay kapitan nga si Jesus Arcelo kalabot niining kalihukan sa mga adik diha sa ilang dapit.

Matud pa ni Benatiro sa Banat News gawas sa pagsige og suyop, mireklamo usab ang mga opisyales sa maong barangay nga kanunay'ng magpabuto og armas ang mga suspek sa ilang dapit.

Atol sa pagpatrolya naatlan sa kapolisan ang payag diin gidudahang dunay nanuyop apan wala pa makaduol ang mga polis nanagan na ang grupo hinungdan sa nahitabong ginukdanay.

Si Pasilang nasundan sa mga polis kutob sa iyang payag apan giingong misuway kini og ibot sa pin sa granada maong daling gilayog ni Benatiro ang suspek hinungdan sa pagkabun-og sa hepe sa kapolisan.

Diha na nadiskubrehi sa kapolisan nga dunay gihipusang duha ka rifle grenade nga may serial number nga 00585 ug 005885, usa ka fragmentation grenade (apple type), usa ka kalibre 45 pistola nga may siyam ka buhing bala, usa ka 38 rebolber, usa ka frontier rebolber nga may 26 ka balang kalibre 5.56 mm(bala sa M16 rifle), lima ka buhing bala sa 9mm, ug nagkadaiyang basiyo sa mga bala.

Lakip sa nakuha mao ang usa ka stick nga marijuana ug tulo ka upos niini, usa ka posporong dunay sulod nga marijuana, duha ka paketeng may sulod nga gidudahang shabu, duha ka plastik nga may sulod usab nga pinaugang marijuana, mga paraphernalia para pag-repak sa gituohang shabu, daghang mga paketeng inablihan ug gituohang halin nga P400.

Ang suspek kasamtangang gitanggong karon sa karsel sa kapolisan alang sa pagpasaka og kaso.