Dunay nakasapi sa kemikal vs dengue?

Ipa-imbestigar ni Bise Mayor Micheal Rama ang gihugonhugonan nga kuwestyonabling pagpamalit sa konseho sa siyudad og mga kemikal nga gigamit karon sa spraying operation sa City Health Department sa kampanya pagbungkag sa mga itloganan sa lamok nga nagdala og dengue sa mga kabarangayan dinhi sa dakbayan.

Una nang mitumaw ang report nga dunay mga opisyal nga nga naka-komisyon sa siyudad sa pagpamalit sa maong mga kemikal.

Gi-insister sa ni Rama ang paghimo og pakisusi ning maong kontrobersiya tungod kay dili siya buot nga mahitabo ang gikabalak-an niyang kahiwian ubos ning iyang liderato isip presiding officer sa konseho sa siyudad.

Giklaro ni Rama nga dili usab siya buot nga ang kasamtangang set-up sa konseho maoy maghatag ug dautang dungog sa konseho. "Wala ta magkonsehal aron mag-broker," matud ni Rama.

Gitug-an ni Rama nga hangtud karun pabiling wala pa siya makakita sa maong purchase request kabahin sa pagpamalit ug mga chemicals nga gigamit karun batuk sa dengue human gi-deklarar sa konseho ubos sa state of calamity tungod sa pagsaka sa gidaghanon sa nataptan sa maong sakit.

Hinuon gipasidan-an sa besi mayor ang mga konsehal nga dili na mohimo og purchase request alang sa pagpamalit ug mga tambal og bisan unsang kinahanglanon kun walay opisyal nga request gikan sa mga hingtungdang departamento.

Sa labing uwahing natala nga record sa City Health mokabat na ngadto sa kapin sa 500 ka mga kaso sa dengue dinhi sa dakbayan karung tuiga ug dul-an na usab sa 20 ang nangamatay.