Rama: Cebu not a 'livable city'

Dili pa kumbinsido ang ubang mga opisyal sa siyudad sa Sugbo kun tinuoray bang livable city kun nindot nga puy-an ang dakbayan kun itandi sa ubang mga dapit dinhi sa nasud.

Gipadayag ni Bise Mayor Micheal Rama, tsirman sa Police Coordinating and Advisory Council PCAC nga maisip lang nga nindot kaayong puy-an ang usa ka siyudad kon protektado ang siguridad sa mga molupyo niini ug labaw sa tanan hingpit nga napatuman ang mga lagda sa balaod.

Gibutyag ni Rama dihang nahinabi sa mga tigbalita kagahapon nga kun tinuoray'ng naglihok ang vigilante dinhi sa dakbayan nga maoy utok sa sunod sunod nga pagtumba sa mga gitumbok nga notadong kriminal dili maisip nga nindot livable city ang Sugbo.

Kini tungod kay dili maayung timailhan sa usa ka maayong siyudad nga bastabasta na lang pamusilon ug pamatyon ang si bisan kinsang mga indibidwal ug bisan kadtong mga gitumbok nga kriminal nga wala ipaagi sa due process.

Niadtong miaging adlaw lain na usab nga ex-convict nga naila sa pangalan nga Richard Abalo nga gikan sa Bagong Buhay Rehabilitation Center kon BBRC ang gipusil patay sa may dalan Colon.

Gihulagway nga ika-87 na ka pagpamatay dinhi sa siyudad nga gituohang binuhatan sa mga vigilante.

Nagkanayon si Rama nga angay pang susihon ang criteria kun nagpabilin bang livable city ang siyudad sa Sugbo.