Indian gipusil sa nag-motor

Negosyanteng Indian national nga gikaliguan og pito ka bala sa kalibre 45 kritikal milandig sa tambalanan human kini banhigi sa upat ka wala mailhing mga tawo luwan sa duha ka motorsiklo diha sa dalan Don Gil Garcia barangay Capitol Site ning dakbayan sa milabay'ng gabii.

Giila ang biktima nga mao si Vinayagamoorthy Vinalan, 30, minyo, lumad nga taga Tirupur, Tamilnado sa India ug kasamtangang nagpuyo sa Westpoint Inn sa naasoy'ng barangay.

Si Vinalan matud pa sa Homicide Section, negosyante og scrap irons padulong unta manihapon dihang kalit kining gibanhigan sa duha ka tawo samtang ang laing duha maoy lookout sa namusil.

Sumala pa ni SPO4 Alex Dacua nakadagan padulong sa dalan Llorente si Vinalan bisan sa iyang mga igo sa lawas apan giusban kini maong naigo kini sa buko-buko hinungdan nga nasukamod kini didto sa tindahan og mga prutas.

Giingong ang tindera sa mga prutas maoy nakaluwas sa biktima dihang tiwasan unta kini sa mga hitman apan gumikan sa hangyo nga basin maangin ang uban wala na usbi si Vinalan.

Ang mga suspek daling miikyas luwan sa usa ka kolor pulang XRM ug usa ka kolor yellow nga TMX motorsiklo, dunay nakuhang pito ka basiyo sa kalibre 45 nga bala ang Homicide Section sa maong dapit.

Si SPO3 Mario Revilla sa Mobile Patrol Group car 512 maoy midala sa biktima sa sikbit nga pribadong tambalanan.

Sigun pa ni Dacua sa Banat News dunay impormasyon silang nadawat nga dunay tawong buot untang mangutang kang Vinalan nga wala niini tuguti ug mao karon ang gidudahan sa kapolisan nga motibo sa pagpatay.