Ubol-ubol giluglog

Gisusamag usa ka baboy nga giihaw ang usa ka wala pa mailhing mamistahay dihang giluglog ang liog niini samtang natulog sa usa ka lantay pila ka metros gikan sa kapilyang gipistahan kagahapon sa kaadlawon diha sa Barangay Usmad lungsod sa Argao.

Ang biktima kinsa hamtong na ang pangidaron nagsuot og karsones nga kolor brown, t-shirt nga green ang kolor ug sa ilawom niini dunay saliko nga kolor pula ug nagtsinelas, nagpailang Joel nga taga Mabolo.

Ang barangay tanod nga si Moises Sardido kinsa padulong na unta mopauli maoy nakakita sa biktima nga nagkisi-kisi diha sa yuta nga nagbanaw ang dugo tupad sa lantay nga gihigdaan niini.

Matud pa sa kapolisan sa sayo niadtong nakalabay'ng adlaw nakit-an ang biktima nga nagbaktas diha sa Barangay Humgaw padulong sa Barangay Usmad nga maoy nagpista.

Si Inspector Conrado Manatad sa pakighinabi sa Banat News mitug-an nga sa sayo pa ang konsehal sa Usmad nga si Emilio Davis mihatag pa og pagkaon sa biktima ug gipangutana sa pangalan niini ug nag-unsa kini sa ilang dapit.

Nagduda si Manatad nga walay deperensya sa utok ang biktima sanglit tarong man kining manubag ug nagpailang siya si Joel nga taga Mabolo apan wala maklaro kun Barangay Mabolo ba ning dakbayan sa Sugbo. Dugang pa niini namatikdan nga human kini pakan-a sa konsehal adto niini gilabay sa tukmang basurahan ang sagbot nga iyang gikan-an.

Usa ka lalaking dunay rekord sa bilangguan tungod sa kasong frustrated homicide sa dakbayan sa Lapu-Lapu ug gikatahong nanigbas sa iyang ig-agaw niadtong nakalabayng semana ang giimbitar sa kapolisan sa Argao kagahapon .

Matud pa ni Manatad kining maong tawo maoy namay-ungan sa tanod nga nagdaling miikyas sa dapit dihang nakaplagan niini ang biktima diha sa may kapilya. Dako ang pagtuo ni Manatad nga paregla ray hinungdan sa pagpatay sa biktima. - Uban sa report ni Wen Celen