3 mil nasikop sa CESET tungod sa basura

Dul-an na sa tres mil ka mga indibidwal ang nadakpan sa City Environment Sanitation and Enforcement Team (CESET) nga nasakpang nakahimo og mga kalapasan sa pagsagop sa hustong mga pamaagi sa paglabay ug basura.

Gibutyag ni Engr. Samuel Dy, hepe sa CESET dihang nahinabi sa Banat News nga sa 2,741 ka mga nadakpan nila nga nakahimo og kalapasan sa "no segregation no collection of garbage policy," 38 niini ang ilang napasakaan og pormal nga kaso sa korte niadtong milabay'ng semana apan dunay uban niini ang gibalik tungod sa kapakyas nila og kompleto sa mga ebidensiya.

Matud ni Dy nga duna nay 235 niini ang nakig-compromise na sa ilang kalapasan nga nahimo og mipresentar sa gipang-isyu nga citation ticket ngadto kanila sa buhatan sa City Treasurer's Office ug gipamulta og tag P500 matag usa.

Samtang ang uban niini gihatagan og pito ka adlaw nga tagal human kini madakpi ug naisyuhan og mga citation ticket sa pag-asikaso ug pagbayad og multa sa mao nilang kalapasan sa City Treasure'rs Office ug kon mapakyas kini human sa maong tagal, irekomendar na usab kini nga pasakaan og tukmang kaso sa korte.

Matud ni Dy, ang kapin sa 200 mil ka mga deputized agent sa CESET gikan sa 54 ka mga urban barangays nga maoy pilot area ning maong proyekto ang nakasikop ning mga indibidwal nga nakahimo og kalapasan sa paglabay ug basura.